Ka përfunduar me sukses mobiliteti i personelit akademik dhe administrativ i Universitetit “Haxhi Zeka” në kuadër të “Digital Week” të mbajtur në Universitetin Cote d’Azur në Francë. Ky mobilitet është pjesë e përpjekjeve të vazhdueshme të universitetit për të zgjeruar horizontet e tij akademike dhe për të rritur bashkëpunimin ndërkombëtar.
Gjatë kësaj jave, stafi i Universitetit “Haxhi Zeka” pati mundësinë të marrë pjesë në seminare dhe trajnime të ndryshme, të fokusuara në avancimet digjitale dhe inovacionet në arsimin e lartë. Aktivitetet u përqendruan në zhvillimin e aftësive të reja teknologjike, përmirësimin e metodave të mësimdhënies dhe administrimit, si dhe në krijimin e lidhjeve të reja akademike dhe profesionale me kolegë nga universitetet e tjera pjesëmarrëse.
“Digital Week” në Universitetin Cote d’Azur është një ngjarje prestigjioze që mbledh akademikë dhe profesionistë të arsimit nga mbarë bota për të shkëmbyer njohuri dhe përvoja mbi temat më të rëndësishme të teknologjisë dhe digjitalizimit në edukim. Pjesëmarrja e Universitetit “Haxhi Zeka” në këtë ngjarje thekson angazhimin e tij për të ndjekur ritmet e zhvillimeve globale dhe për të ofruar arsim të cilësisë së lartë për studentët e tij.