Të dashur studentë, kolegë dhe vizitorë,

Universiteti “Haxhi Zeka” është ndërtuar në bindjen se arsimi i lartë përfaqëson jo vetëm një proces formimi profesional, por një mision shoqëror dhe qytetar me përgjegjësi të thellë ndaj zhvillimit të vendit. Në këtë frymë, universiteti ynë e ushtron veprimtarinë e tij mbi tri misione themelore: mësimdhënien dhe mësimnxënien cilësore, kërkimin shkencor dhe inovacionin, si dhe shërbimin aktiv ndaj shoqërisë dhe zhvillimit të qëndrueshëm.

Misioni i parë, ai i mësimdhënies, ka në qendër, zemër dhe shpirt studentin si subjekt aktiv të dijes. Qëllimi ynë është të ofrojmë programe studimi bashkëkohore, ndërdisiplinare dhe të përputhshme me nevojat reale të tregut të punës, duke ndërtuar kompetenca profesionale, shkathtësi praktike dhe mendim kritik. Universiteti synon të përgatisë kuadro të afta jo vetëm për t’u integruar në tregun e punës, por edhe për ta transformuar atë përmes dijes, kreativitetit dhe përgjegjësisë qytetare.

Misioni i dytë, kërkimi shkencor dhe inovacioni, përbën shtyllën mbi të cilën ndërtohet identiteti akademik i një universiteti modern. Universiteti “Haxhi Zeka” është i orientuar drejt prodhimit të dijes së re, kërkimit të aplikuar dhe bashkëpunimit shkencor kombëtar e ndërkombëtar. Kërkimi ynë synon të mos mbetet vetëm në hapësirën akademike, por të shndërrohet në vlerë shoqërore, ekonomike dhe institucionale, duke kontribuar në politika publike, zhvillim rajonal dhe inovacion ndërmarrës.

Misioni i tretë, shërbimi ndaj shoqërisë, reflekton rolin e universitetit si aktor aktiv në zhvillimin social dhe ekonomik. Universiteti ynë e sheh veten si partner strategjik të institucioneve publike, sektorit privat, shoqërisë civile dhe komunitetit më të gjerë. Përmes këtij angazhimi, UHZ synon të ndërtojë ura të qëndrueshme bashkëpunimi dhe të kontribuojë drejtpërdrejt në përmirësimin e cilësisë së jetës dhe në zhvillimin e qëndrueshëm të vendit.

Në këtë kontekst, Universiteti “Haxhi Zeka” po ndërton identitetin e tij si universitet ndërmarrës 4.0, i cili integron dijen akademike me inovacionin, teknologjinë, sipërmarrjen dhe përgjegjësinë shoqërore. Qasja jonë mbështetet në modelin e helisit të katërfishtë, ku universiteti bashkëvepron në mënyrë të strukturuar me industrinë, institucionet publike dhe shoqërinë, duke krijuar ekosisteme të dijes dhe zhvillimit.

Sfidat përpara nesh janë të shumta, por vizioni ynë është i qartë: ta shndërrojmë Universitetin “Haxhi Zeka” në një institucion bashkëkohor, konkurrues dhe të respektuar, i cili prodhon dije, formon liderë të së nesërmes dhe kontribuon në mënyrë aktive në zhvillimin e Kosovës. Ky vizion nuk është individual, por i përbashkët, dhe realizohet vetëm përmes përkushtimit, bashkëpunimit dhe besimit në vlerat akademike.