Komuna e radhës me të cilën Universiteti Haxhi Zeka në Pejë nënshkroi marrëveshje bashkëpunimi është Komuna e Istogut. Rektori i UHZ-së, prof.dr. Armand Krasniqi u prit në takim nga kryetari i kësaj komune, z. Ilir Ferati. Pjesëmarrës në takim ishin edhe këshilltari i rektorit, Luan Lulaj, si dhe kryesuesi i kuvendit komunal në Istog, z. Enver Rugova.
Në marrëveshjen e re të bashkëpunimit, u theksua thellimi i mëtejshëm i lidhjeve midis Universitetit Haxhi Zeka dhe Komunës së Istogut. Një aspekt i rëndësishëm i këtij bashkëpunimi është realizimi i projektit të Forumit të Zhvillimit Ekonomik Rajonal. Ky forum synon të sjellë përmirësimin e zhvillimit ekonomik në rajon, duke ndihmuar në krijimin e mundësive të reja për investime dhe rritje ekonomike.
Kjo marrëveshje e re tregon vullnetin e dy palëve për të ndarë njohuritë, burimet dhe ekspertizën për të ndihmuar në rritjen e kapaciteteve dhe mundësive të zhvillimit në të dy anët. Si rezultat i kësaj marrëveshje, mund të presim bashkëpunim të ngushtë dhe inovativ në të ardhmen. Kjo do të sjellë përfitime të mëdha për të dy institucionet dhe për komunitetin në tërësi.
