Universiteti Haxhi Zeka (UHZ) dhe Universiteti i Tetovës (UT) kanë nënshkruar marrëveshje bashkëpunimi me qëllim forcimin e lidhjeve akademike dhe shkencore mes dy institucioneve. Kjo marrëveshje synon të krijojë mundësi të reja për studentët dhe stafin akademik përmes projekteve të përbashkëta kërkimore, shkëmbimeve akademike dhe organizimit të aktiviteteve të përbashkëta shkencore.
Në kuadër të kësaj marrëveshjeje, dy universitetet do të bashkëpunojnë në shkëmbimin e stafit akademik dhe studentëve, organizimin e konferencave dhe seminareve të përbashkëta, si dhe në zhvillimin e projekteve inovative kërkimore. Gjithashtu, do të krijohen mundësi për sigurimin e fondeve nga burime të ndryshme kombëtare dhe ndërkombëtare për të mbështetur iniciativat akademike dhe kërkimore të përbashkëta.
Marrëveshja do të jetë në fuqi për pesë vjet dhe do të shërbejë si një bazë e fortë për zhvillimin e partneriteteve të mëtejshme ndërmjet dy institucioneve, duke kontribuar në rritjen e cilësisë së arsimit të lartë dhe kërkimit shkencor në rajon.
