Rektori i Universitetit “Haxhi Zeka” (UHZ) në Pejë, Prof. Dr. Armand Krasniqi, realizoi një vizitë zyrtare në Komunën e Malishevës, ku u prit nga kryetari i komunës, z. Ekrem Kastrati.
Gjatë takimit, u diskutua organizimi i Konferencës së Tretë të FERD, si dhe mundësia e mbështetjes institucionale për këtë ngjarje të rëndësishme. Kryetari Kastrati konfirmoi përkrahjen e plotë të Komunës së Malishevës për organizimin e konferencës, duke theksuar rëndësinë e bashkëpunimit mes universiteteve dhe pushtetit lokal për krijimin e politikave të qëndrueshme ekonomike dhe fuqizimin e komuniteteve.
Forumi Ekonomik Rajonal – Dukagjini dhe rëndësia e tij
Ky forum, i themeluar një vit më parë në bashkëpunim me komunat e Pejës, Malishevës, Deçanit, Junikut, Klinës dhe Istogut, ka për synim fuqizimin e bashkëpunimit ndërinstitucional dhe krijimin e një platforme për adresimin e sfidave të ndryshme.
Përmes aktiviteteve të tij, forumi synon të krijojë ura komunikimi ndërmjet aktorëve të ndryshëm dhe të mbështesë iniciativa për zhvillim të qëndrueshëm.