Studime në Teknologjinë e Informacionit në Universitetin Haxhi Zeka

Shkruar nga: Prof. asoc. dr. Ylber Januzaj

Në ditët e sotme, teknologjia e informacionit po formëson të ardhmen dhe po krijon mundësi të reja në secilën industri moderne. Në një botë ku digjitalizimi është bërë pjesë e pandashme e jetës sonë, aftësitë në këtë fushë nuk mund të konsiderohen më vetëm një përparësi, por ato janë një domosdoshmëri. Si profesor i informatikës në Universitetin Haxhi Zeka pothuajse çdo ditë vërej potencialin e studentëve tanë dhe sa i rëndësishëm është një edukim cilësor që i përgatit ata për sfidat dhe mundësitë e tregut të punës.

Për studentët e rajonit të Dukagjinit, studimi i IT-së në Universitetin “Haxhi Zeka” nuk mund të konsiderohet më thjesht një alternativë, por një zgjedhje strategjike. Më parë, shumë të rinj mendonin se për të pasur një arsim cilësor në teknologji, duhej të largoheshin nga familjet e tyre dhe të shkonin në qendra të mëdha universitare. Sot, kjo nuk është më e nevojshme. Në Universitetin “Haxhi Zeka” kemi ndërtuar një ambient modern dhe inovativ, ku studentët mund të mësojnë me infrastrukturë të avancuar dhe me një qasje praktike, pa kosto të larta jetese dhe pa pasur nevojë të largohen nga komuniteti i tyre.

Aktualisht, Universiteti Haxhi Zeka ofron studime të nivelit bachelor dhe master në fushën e IT-së, programe këto të ndërtuara jo vetëm për të transmetuar njohuri teorike, por edhe për të përgatitur studentët për tregun e punës. Ajo që na veçon është lidhja e ngushtë me industrinë, ku studentët tanë kanë mundësinë të përfshihen në praktika profesionale, duke fituar përvojë të drejtpërdrejtë që para diplomimit. Kjo është një avantazh i madh që i ndihmon ata të bëhen konkurrues në tregun e punës brenda dhe jashtë vendit.

Përveç kësaj, ne jemi të angazhuar në sjelljen e risive dhe inovacionit. Aktualisht, stafi ynë akademik është duke zhvilluar një model kompjuterik për mësim të personalizuar përmes Machine Learning, një projekt që synon të transformojë mënyrën se si mësojnë studentët, duke ofruar një përvojë të përshtatur sipas nevojave të tyre individuale. Ky është vetëm fillimi, pasi shumë shpejt pritet zgjerimi i programeve të IT-së, duke sjellë fusha të reja që do të përputhen me zhvillimet më të fundit në teknologji dhe kërkesat e tregut të punës.

Një aspekt tjetër që e bën UHZ një zgjedhje të veçantë për studentët e IT-së janë mundësitë ndërkombëtare. Përmes partneriteteve tona me universitete jashtë vendit, studentët tanë kanë mundësi të ndjekin një semestër shkëmbimi akademik dhe të përfitojnë nga eksperienca ndërkombëtare në fushën e teknologjisë. Një përvojë e tillë është e çmuar jo vetëm për të zgjeruar njohuritë akademike, por edhe për të krijuar lidhje me profesionistë dhe institucione jashtë kufijve.

Për të mbështetur të gjitha këto zhvillime, infrastruktura dhe pajisjet moderne të universitetit po përmirësohen vazhdimisht. Synimi ynë është të krijojmë një ambient ku studentët të kenë qasje në teknologjinë më të fundit, duke u përgatitur në mënyrën më të mirë për sfidat që i presin në tregun e punës.

Teknologjia e informacionit është një fushë që ofron mundësi të pafundme dhe Universiteti Haxhi Zeka është duke investuar për ta bërë këtë fushë sa më të qasshme dhe të avancuar për studentët tanë. Nëse dikush kërkon një edukim të mirë në IT, me infrastrukturë të fortë, programe moderne, lidhje me industrinë dhe mundësi ndërkombëtare, Universiteti “Haxhi Zeka” është vendi i duhur për ta.

Besoj fuqishëm se studentët që zgjedhin këtë rrugë do të kenë një avantazh të madh për të ardhmen. Dhe për ata që vijnë nga rajoni i Dukagjinit, kjo nuk është më thjesht një mundësi, por është një realitet i prekshëm që mund ta shfrytëzojnë për të ndërtuar një karrierë të suksesshme.