Në ambientet e Universitetit “Haxhi Zeka” në Pejë u zhvillua me sukses edicioni i dytë i Peja Peace Forum 2025, një ngjarje ndërkombëtare e cila bashkoi liderë, akademikë, diplomatë dhe aktivistë nga vende të ndryshme të botës, nën moton frymëzuese “Ndërtimi i besimit dhe mirëkuptimit në një botë plot ndryshime.”
Këtë vit, Peja Peace Forum 2025 u organizua nga Rotary Club Peja në bashkëpunim me Universitetin “Haxhi Zeka”, duke shënuar një tjetër hap të rëndësishëm drejt forcimit të bashkëpunimit mes akademisë, shoqërisë civile dhe institucioneve ndërkombëtare në funksion të paqes dhe zhvillimit të qëndrueshëm.
Forumi u hap me fjalën përshëndetëse të Dr. Neshad R. Albani, themelues i Peja Peace Forum, i cili theksoi rëndësinë e dialogut, mirëkuptimit dhe bashkëpunimit si themele të paqes së qëndrueshme.
Në vijim, Rektori i Universitetit “Haxhi Zeka”, Prof. Dr. Armand Krasniqi, në fjalën e tij mirëseardhëse, theksoi rolin që universiteti po luan në ndërtimin e një kulture të paqes dhe tolerancës përmes arsimit, kërkimit shkencor dhe bashkëpunimeve ndërkombëtare.
Në mesin e folësve të nderuar ishin figura të shquara vendore dhe ndërkombëtare, përfshirë Gjeneralin Wesley Clark, ish-Komandant Suprem i NATO-s, i cili mbajti kumtesën me temë “Domethënia dhe vlera e qytetarisë – shembuj historikë të dialogut civil në veprim.”
Gjithashtu, forumi mirëpriti ekspertë dhe personalitete të njohura si Dr. Sc. Ahmet Ismaili, Guvernator i Bankës Qendrore të Kosovës, Prof. Taro Komatsu nga Universiteti i Sofias në Tokio, Ms. Alison Sutherland, dhe Mrs. Tina Ramirez, të cilët ndanë përvoja dhe reflektime mbi zhvillimin ekonomik pas konflikteve, rolin e arsimit në pajtim, ndikimin e Rotary në ndërtimin e paqes, si dhe fuqinë e edukimit për të drejtat e njeriut. Prezent në Forumin e Paqes 2025 ishte dhe zv. Komandanti i RCW, nën kolonel Behar Mara.
Një nga momentet më domethënëse të ditës ishte shfaqja e dokumentarit “Rruga nga dhimbja drejt shpresës”, një vepër e fuqishme që përshkruan rrugëtimin nga vuajtja drejt faljes dhe pajtimit, e cila u pasua nga një diskutim ndërveprues me pjesëmarrësit.
Ngjarja u përmbyll me fjalën përmbyllëse të Prof. Bashkim Nurboja, i cili theksoi nevojën për bashkëpunim të vazhdueshëm ndërinstitucional dhe përforcimin e përpjekjeve për paqe, drejtësi dhe zhvillim në rajon.
Ky forum përbën një tjetër dëshmi të qartë të përkushtimit të Universitetit “Haxhi Zeka” për të promovuar vlerat universale të paqes, dialogut dhe bashkëjetesës përmes arsimit cilësor dhe hulumtimit shkencor.
Si një qendër e dijes dhe inovacionit, UHZ vazhdon të jetë një urë lidhëse midis akademisë, institucioneve publike dhe shoqërisë civile, duke kontribuar në ndërtimin e një shoqërie më të drejtë, më të hapur dhe më paqësore për brezat e ardhshëm
