Qendra për Ekselencë ka përfunduar dhe publikuar Studimin Bazë për Zhvillimin e Kapaciteteve, Zhvillimin Profesional dhe Cilësinë Akademike në Universitetin e Pejës “Haxhi Zeka”, një dokument analitik i hartuar për të vlerësuar gjendjen aktuale të kapaciteteve institucionale, zhvillimit profesional të stafit dhe prioriteteve strategjike për avancimin e cilësisë akademike.
Studimi ofron një analizë të bazuar në evidencë, të mbështetur në shqyrtimin e dokumenteve institucionale dhe rregullative, analizën e të dhënave statistikore, si dhe konsultimet me akterët kyç universitarë. Gjetjet e tij identifikojnë fushat prioritare për zhvillim dhe evidentojnë mundësitë për forcimin e kapaciteteve akademike dhe institucionale në përputhje me objektivat strategjike të universitetit dhe standardet e sigurimit të cilësisë në arsimin e lartë.
Ky studim përfaqëson një instrument të rëndësishëm për planifikimin strategjik dhe vendimmarrjen e bazuar në evidencë, duke krijuar një pikë reference për zhvillimin e programeve të ardhshme të trajnimit, avancimin e praktikave akademike dhe forcimin e kulturës institucionale të cilësisë dhe ekselencës.
Përmes këtij angazhimi, Universiteti i Pejës “Haxhi Zeka” riafirmon përkushtimin e tij për zhvillimin e vazhdueshëm akademik, përmirësimin e cilësisë së mësimdhënies dhe kërkimit shkencor, si dhe harmonizimin me standardet bashkëkohore evropiane të arsimit të lartë.