In this context, Haxhi Zeka University in Peja dhe OJQ “ ABSM – Qendra Edukative dhe Këshillimore” kanë formalizuar sot bashkëpunimin përmes nënshkrimit të një marrëveshjeje që krijon mundësi të reja për zhvillimin e aftësive profesionale të studentëve dhe afrimin e mëtejshëm të universitetit me partnerët e jashtëm.
Në takimin e zhvilluar në Universitetin “Haxhi Zeka” morën pjesë Prof. Dr. Armand Krasniqi, Rektor i UHZ-së; Dr. sc. Prof. assoc. Alma Shehu-Lokaj, Prorektore; Prof. Dr. Afrim Selimaj, Dekan i Fakultetit të Menaxhimit në Turizëm, Hoteleri dhe Mjedis, si dhe z. Nazmi Jakurti, përfaqësues i OJQ “ABSM – Qendra Edukative dhe Këshillimore”.
Marrëveshja paraqet bazën për realizimin e aktiviteteve konkrete në fushën e aftësimit profesional, trajnimeve dhe zhvillimit të shkathtësive praktike të studentëve, me theks të veçantë në fushën e turizmit, hotelerisë dhe mikpritjes. Në këtë mënyrë, njohuritë akademike synohet të plotësohen me përvoja dhe kompetenca që studentët mund t’i përdorin drejtpërdrejt në zhvillimin e tyre profesional dhe në tregun e punës.
Gjatë takimit u theksua se bashkëpunimi nuk synohet të mbetet vetëm brenda kufijve të marrëveshjes së nënshkruar. Palët u dakorduan që në të ardhmen të shqyrtojnë zgjerimin e gamës së marrëveshjeve dhe aktiviteteve të përbashkëta, duke identifikuar fusha të reja ku kapacitetet e ABSM-së mund të ndërthuren me misionet akademike, kërkimore dhe zhvillimore të Universitetit “Haxhi Zeka”.
Për UHZ-në, ky bashkëpunim merr një rëndësi të veçantë edhe në kuadër të orientimit të tij drejt modelit të universitetit ndërmarrës dhe University 4.0. Në këtë perspektivë, ABSM pritet të bëhet një nga partnerët që kontribuon në fuqizimin e heliksit të katërfishtë, ku universiteti, sektori ekonomik, institucionet publike dhe shoqëria civile bashkëveprojnë për krijimin e dijes, zhvillimin e aftësive dhe gjenerimin e ndikimit konkret në komunitet.
Rektori Prof. Dr. Armand Krasniqi theksoi rëndësinë që partneritetet e Universitetit të kalojnë gjithnjë e më shumë nga bashkëpunimi formal drejt programeve konkrete, trajnimeve, angazhimit të studentëve dhe krijimit të vlerës së matshme për zhvillimin e tyre profesional.
Përfaqësuesi i ABSM-së, z. Nazmi Jakurti, shprehu gatishmërinë që bashkëpunimi me UHZ-në të zgjerohet gradualisht përtej aktivitetit fillestar, përmes programeve të reja të trajnimit, aftësimit profesional dhe iniciativave të përbashkëta që mund të kontribuojnë në zhvillimin e studentëve dhe në forcimin e lidhjes së Universitetit me shoqërinë civile dhe tregun e punës.
Me këtë marrëveshje, Universiteti “Haxhi Zeka” vazhdon të zgjerojë rrjetin e partnerëve dhe të ndërtojë një ekosistem në të cilin studenti, universiteti dhe partnerët e shoqërisë bashkohen rreth një qëllimi të përbashkët: shndërrimit të dijes në aftësi dhe të aftësive në mundësi zhvillimi.
