Nga data 11 deri më 13 shtator 2024, Universiteti “St. Kliment Ohridski” në Bitola, Maqedonia e Veriut, është nikoqir i Konferencës së 9-të të Forumit të Rektorëve të Europës Juglindore dhe Ballkanit Perëndimor. Ky forum mblodhi 52 përfaqësues të universiteteve nga 27 vende, duke u shndërruar në një platformë të rëndësishme për dialogun dhe bashkëpunimin ndëruniversitar në rajon. Në mesin e pjesëmarrësve nga universiteti “Haxhi Zeka” prezent në këtë konferencë po merr pjesë rektori i UHZ-së, Prof. Dr. Armand Krasniqi, prorektorja për Mësim, Çështje Studentore dhe Kërkime Shkencore, Prof. Ass. Dr. Alma Shehu Lokaj, Drejtoresha e Zyrës për Bashkëpunim Ndërkombëtar, znj. Arberora Haxhija, dhe Drejtori i Logjistikës, z. Sami Gjuka. Pjesëmarrja e tyre në këtë forum shënon një angazhim të vazhdueshëm për forcimin e partneriteteve ndërkombëtare dhe përmirësimin e kapaciteteve të universitetit “Haxhi Zeka”.
Konferenca përqëndrohet në një sërë çështjesh me rëndësi kritike për zhvillimin e universiteteve dhe për rolin që ato luajnë në formësimin e së ardhmes së arsimit të lartë në Europën Juglindore dhe Ballkanin Perëndimor. Një nga temat kryesore të diskutimit ishte zhvillimi i Aleancave të Universiteteve Europiane, një iniciativë që synon të rrisë bashkëpunimin dhe të krijojë mundësi të reja për shkëmbimin e njohurive dhe burimeve mes institucioneve të arsimit të lartë. Diskutimet u përqendruan në mënyrën se si këto aleanca mund të përmirësojnë cilësinë e arsimit, të fuqizojnë inovacionin dhe të krijojnë mundësi të reja për studentët dhe stafin akademik.
Në ditën e dytë të konferencës, tematika u zgjerua më tej duke trajtuar integritetin akademik, vlerat e universiteteve, dhe përpjekjet për të promovuar barazinë gjinore në arsimin e lartë. Diskutimet mbi integritetin akademik theksuan rëndësinë e etikës në kërkimin shkencor dhe proceset arsimore, duke nënvizuar nevojën për rritjen e transparencës dhe përgjegjësisë në universitetet moderne. Po ashtu, u diskutua edhe për barazinë gjinore, një çështje kyçe në ndërtimin e institucioneve më gjithëpërfshirëse dhe të barabarta, ku universitetet janë thirrur të luajnë një rol më aktiv në promovimin e mundësive të barabarta për të gjithë anëtarët e komunitetit akademik.
