I përkushtuar, i profilizuar dhe i orientuar drejt cilësisë, inovacionit dhe ndërkombëtarizimit.
Me përkushtim të lartë institucional dhe vizion të qartë për zhvillimin e mëtejmë, Universiteti “Haxhi Zeka” në Pejë është duke zhvilluar punëtorinë për finalizimin e Planit Strategjik 2026 – 2030, dokumentit themelor që do të orientojë zhvillimin e universitetit në vitet e ardhshme.
Në këtë proces të rëndësishëm janë angazhuar të gjitha organet drejtuese dhe menaxheriale të universitetit, përfshirë Këshillin Drejtues, Rektoratin, dekanët e njësive akademike dhe administratën universitare. Përmes diskutimeve profesionale, analizave gjithëpërfshirëse dhe vlerësimit të prioriteteve strategjike, po harmonizohen objektivat zhvillimore dhe treguesit e performancës që do të udhëheqin institucionin gjatë periudhës 2026 – 2030.
Plani Strategjik synon fuqizimin e qeverisjes institucionale, avancimin e cilësisë në mësimdhënie dhe kërkim shkencor, rritjen e ndërkombëtarizimit, mbështetjen e studentëve, zhvillimin e infrastrukturës moderne universitare dhe ndërtimin e një ekosistemi të integruar akademik në përputhje me standardet evropiane.
Universiteti “Haxhi Zeka” mbetet i përkushtuar për t’u profilizuar si një institucion modern, inovativ dhe i orientuar drejt zhvillimit të qëndrueshëm, duke forcuar pozitën e tij si një nga institucionet më të besueshme dhe më të respektuara të arsimit të lartë në Kosovë.
Kjo punëtori përfaqëson një hap të rëndësishëm drejt ndërtimit të një vizioni të përbashkët, i cili do të shërbejë si bazë për arritjen e objektivave strategjike dhe për rritjen e ndikimit të Universitetit “Haxhi Zeka” në nivel kombëtar dhe ndërkombëtar.
