Rektori i Universitetit “Haxhi Zeka” në Pejë, Prof. Dr. Armand Krasniqi, së bashku me bashkëpunëtorët e tij, kanë vizituar Komunën e Deçanit ku u pritën nga kryetari i komunës z. Bashkim Ramosaj. Qëllimi i kësaj vizite ishte organizimi i konferencës së dytë të Forumit Ekonomik Rajonal – Dukagjini – FERD. Konferenca e dytë e FER-Dit është një ngjarje që pritet të sjellë ekspertë të fushave të ndryshme të cilët do të ofrojnë ekspertizën e tyre në shërbim të zhvillimit ekonomik rajonal.
Gjatë vizitës, rektori Krasniqi dhe ekipi i tij diskutuan me kryetarin Ramosaj për mundësinë e organizimit të konferencës së dytë të FER-Dit në Qendrën Rinore të Komunës së Deçanit. Kryetari Ramosaj shprehu gadishmërinë e institucionit që ai përfaqëson për zhvillimin e punimeve të konferencës në këtë komunë dhe u zotua për mbështetje organizative dhe logjistike të saj, duke siguruar që çdo aspekt të jetë i mirëplanifikuar dhe i koordinuar.
Kujtojmë që FER-D është themeluar një vit më parë në bashkëpunim me komunën e Pejës, Deçanit, Junikut, Klinës, Istogut dhe Malishevës dhe ka si qëllim kryesor promovimin, zhvillimin ekonomik, akademik dhe social të rajonit dhe synon nxitjen e dialogut rajonal me qëllim të politikave ekonomike, vlerave sociale, politike dhe kulturore.