Fakulteti i Arteve me krenari të lartë njofton për suksesin madhështor të profesoreshës sonë të solokëndimit, Prof.Ass. Adelina Paloja, e cila mbrëmë shkëlqeu si soliste në njërën prej skenave më prestigjioze të Evropës.
Në Sallën e Madhe të Koncerteve të Universitetit të Muzikës “Fryderyk Chopin” në Varshavë të Polonisë, Prof.Ass. Paloja dhuroi një performancë virtuoze që la mbresa të thella te publiku polak. Ky koncert, i titulluar “Kosova në Tinguj – Sounds of Kosova”, u realizua në bashkëpunim me Orkestrën Harkore të Filharmonisë së Kosovës dhe nën patronatin e Ambasadës së Republikës së Kosovës në Poloni.
Zëri dhe interpretimi i saj i fuqishëm në këtë tempull të muzikës klasike nuk ishte vetëm një sukses personal, por një prezantim dinjitoz i vlerave akademike dhe artistike të Fakultetit tonë. Ngjitja në këtë skenë historike, që mban emrin e kolosit Frederic Chopin, rikonfirmon statusin e Prof.Ass. Palojës si një ndër ambasadoret më të shquara të artit tonë vokal në botë.
Ky triumf në Varshavë shënon një gurthemel të rëndësishëm në promovimin ndërkombëtar të kulturës kosovare, duke dëshmuar se niveli i lartë profesional i stafit tonë akademik konkurron denjësisht në metropolet më të mëdha botërore.
Fakulteti i Arteve i shpreh përgëzimet më të përzemërta të Prof.Ass. Adelina Paloja për këtë arritje të jashtëzakonshme!
English 
Albanian